Yago yavuze icyatumye yijundika Bruce Melodie
Umuhanzi akaba n’umunyamakuru Nyarwaya Innocent wamamaye nka Yago Pon Dat, yavuze ko kuba yaratangiye gukora umuziki Bruce Melodie akavuga ko icyo ashoboye ari ukuba umunyamakuru byatumye bashwana mu buryo bukomeye.
Ibi yabigarutseho mu kiganiro yagiranye na B&B FM, aho yavuze ko atifuza gukomeza kugirana ibibazo na Bruce Melodie ndetse anasaba imbabazi abantu bose bagiranye nawe ibibazo avuga ko yabitewe n’uburakari yari afite.
Yagaragaje ko yapfuye na Bruce Melodie ibintu bibiri birimo iby’uko yatangiye umuziki Melodie amurwanya.
Ati “Ikintu cya mbere cyanteranyije na Itahiwacu Bruce ni uko natangiye gukora umuziki kandi we atarifuzaga ko nkora umuziki, icya kabiri twapfuye ni uko we n’itsinda rye bagerageje kunshyira hasi bikabananira kugeza n’uyu munsi.”
Yago yasobanuye ko gushwana na Bruce Melodie byatangiye neza mu 2023, igihe yari amaze umwaka umwe atangiye urugendo rwo kuririmba.
Yagaragaje ko icyo gihe Bruce Melodie yatumije itangazamakuru bitewe n’igitaramo yiteguraga, avuga ko badakwiriye kumugereranya na Yago kuko bataririmba kimwe.
Ati “Muri icyo kiganiro yaravuze ngo ntabwo ndirimba nka Yago, ntimukangereranye n’utwo tuntu cyangwa ibyo bintu baririmba nabi, nta miziki bagira.”
B&B Kigali FM yabajije Yago Pon Dat niba yarigeze aganira na Bruce Melodie nyuma y’icyo kiganiro yagiranye n’itangazamakuru, cyane ko mu mivugire ye akunze gushyiramo urwenya rwinshi.
Yago yasubije ko ibyo yagiye abivuga inshuro nyinshi ndetse ko hari n’ikiganiro yavuze ko uyu muhanzi ari umunyamakuru mwiza ariko akaba atari umuhanzi mwiza.
Yavuze ko atazi impamvu Bruce Melodie yabikoraga kuko nta bufasha yigeze amusaba mu rugendo rwe rw’umuziki.
Gusa yavuze ko yigeze kubumusaba inshuro imwe, ubwo yateguraga igitaramo cye cya mbere mu 2023, Bruce Melodie amubwira ko adahari gusa yiteguye kumufasha ibishoboka byose.
Yago avuga ko ikintu gikomeye cyamubabaje ari uko aho kugira ngo amufashe, ahubwo yabujije ibigo bitandukanye byari kumutera inkunga mu gitaramo cye, akabisaba kuyihagarika.
Ati “Ikintu cyambabaje ni ukuntu mu bigo byose bikomeye byo mu Rwanda nari naravuganye na byo nshaka ko bintera inkunga, habura iminsi ine ngo igitaramo cyanjye kigere, nahamagara sinitabwe.”
“Habura iyo minsi, umuntu yaramampagaye, arambwira ngo hari umuntu wahamagaye […] ushinzwe iyamamazabikorwa ry’ikigo akoreramo, aramubwira ngo uwo muhungu ntimuzamufashe yarasaze.”
Ibi Yago Pon Dat yabitangaje nyuma y’uko yumvikanye ashinja Bruce Melodie kumurega ku rubuga rwa YouTube kugira ngo shene ye irusibweho, bitewe n’uburyo yamwibasiraga.
Gusa mu kiganiro Bruce Melodie aheruka kugirana nitangazamakuru, ibyo yarabihakanye, avuga ko atakwishimira kubona Yago abayeho nabi.
Mu biganiro yakoreye kuri iyi shene yarezwe, nyuma y’uko Bruce asohoye indirimbo ye nshya yise ‘Irya 4’ mu kwezi gushize, Yago yahise atangira gusesengura avugamo ko iyi ndirimbo irimo amagambo yise ay’ubujiji.
Ubusanzwe iyi ndirimbo irimo amategeko 10 Bruce Melodie avuga ko yayobora urubyiruko mu nzira nzima, icyakora Yago we yayise aya Gitera, umugabo waranzwe n’ivanguramoko n’ibikorwa byagejeje kuri Jenoside yakorewe Abatutsi.
King Jonathan Ft Mando bakoze mu nganzo basohora indirimbo mu rwego rwo kuryohereza abakunzi b’umuziki muri iki cyumweru turi gusoza.
Flute Umwirongi hano twaguteguriye zimwe ndirimbo nshya zo mu Rwanda no hanze yarwo wakumva cyangwa ukareba muri izi mpera z’icyumweru, ukarushaho kuruhuka neza.
Oniva – Diez Dola Ft The Ben
Indirimbo Oniva ni imwe mu zari zitegerejwe cyane n’abakunzi b’umuziki dore ko yategujwe harimo icyamamare The Ben wafashije Diez Dola nk’umuhanzi ukiri kwiyubaka mu muziki.
Ni indirimbo yasohotse ikavugisha benshi cyane ko muri yo The Ben aba acyurira abantu bashatse kwifashisha ibihuha ngo bamushwanishe n’umugore we Pamella uzwi cyane ku mbuga nkoranyambaga.
Iyi ndirimbo kandi yarsohokanye n’amashusho yayo yakozwe na Director Aky hifashishijwe ikoranabuhanga ry’ubwenge buhangano, AI, bivugisha benshi ururondogoro.
Amajwi yayo yakozwe na Producer Badman Quba afatanyije na Madebeats. Iri no kuri album nshya ‘Propaganda’ Diez Dola yitegura gushyira ahabona nk’uko yabiteguje.
Ibihe (amashusho) – Vestine & Dorcas
Indirimbo Ibihe y’aba bahanzi b’indirimbo zo kuramya no guhimbaza Imana igaruka ku burinzi bw’Imana mu bihe bigoye umuntu uwo ari we wese ashobora kunyuramo.
Bihuzwa no kuba Vestine wo muri iri tsinda aherutse gutangaza ko yagize ibibazo bikomeye bijyanye n’urushako rwe cyane ko ubu rugeretse mu rukiko hagati ye n’umugabo we Idrissa.
Ni indirimbo yasohotse mu buryo bw’amashusho nyuma y’amajwi yayo, ariko ikaba yarakozwe mu gihe cyashize ubwo iri tsinda ryari rikibarizwa mu biganza by’umunyamakuru Murindahabi nk’umujyanama waryo.
Part of me – Logan Joe
Lohan Joe yasohoye indirimbo yise ‘Part of me’ aho aririmbamo ukuntu aba yarakunze umukobwa ndetse akizera ko babaye umwe kandi atakibasha kubihisha abandi.
Darling – Kenny K-Shot
yi ndirimbo nshya y’uyu muhanzi iri kuri album ‘Therapy’ yitegura gusohora. Ni indirimbo irimo inkuru y’umusore utanga ibitambo ngo akunde yereke umukobwa ko amukunda byahebuje, ndetse akamwizeza kuzahora ahari ku bwe.
Ndagukunda – J-sha
Iri tsinda rigizwe n’abakobwa babiri b’impanga bakoze mu nganzo, basohora indirimbo bise ‘Ndagukunda’.
Ni indirimbo y’urukundo ikoze mu njyana gakondo ivangiye, ikaba ivugamo umukobwa wabengutse umusore mwiza akamwizeza kuzabana na we ubuziraherezo.
Mbirikanyi – King Jonathan Ft Mando
Iyi ndirimbo y’aba bahanzi bari kuzamuka neza mu muziki, igaruka ku mibereho y’abantu bashaka kwigira abanyabwenge cyane bagashaka kurya utw’abandi ku mayeri, ariko bikaba bigoye kuba byabahira.
Maso – Mr. Kagame & Sintex
Indirimbo yavuye mu bufatanye bw’aba bahanzi igaruka ku mukobwa mwiza uba warakunzwe n’umusore ariko akamuca inyuma.
Uyu musore abwira umukunzi we mushya ko adateze gushaka undi ahubwo azamunambaho n’iyo yamuhemukira.
Ni wowe – Kelliah
Uyu muhanzikazika uherutse gukora ubukwe na Bob Pro muri Nzeri 2026, yakoze mu ngano asohora indirimbo ye yise ‘Ni wowe’.
Irimo amagambo meza y’urukundo abakunzi babwirana, hakaba harifashishijwemo n’amashusho yafatiwe muri ubwo bukwe.
Obrigado – Basly Ft Niyo Bosco
Umuhanzi w’Umurundi Basly yafatanyije n’Umunyarwanda Niyo Bosco bakora mu nganzo ndetse basohora indirimbo bise Obrigado yo kuramya no guhimbaza Imana.
Ayeeh – Pamaa
Umuhanzi Pamaa, uvukana na Li John, yasohoye iyi ndirimbo irata ubwiza bw’umukunzi.
Wa Musaraba – Rabagirana Choir Ft Gad Byiringiro & Manzi Tecquiero
Iyi ndirimbo yo kuramya no guhimbaza Imana ivuga ubutumwa bw’uko Yesu akunda kandi ko yarokoye ubwoko bw’Imana, abambirwa ibyaha byabwo ku musaraba.